Jam 1 | AOJFILIFITA | STEP | AeꞋ Jems, ape owina God naloma Dembinai Jisas Krais andaꞋ maola amam atom. AndaꞋ basef amama mafeꞋmago ipeꞋ epes hipei Judaipei epes wambotogw loumi 12-peleim. IpeꞋ pakwaha wambel ofagama ipeꞋima ma pafeꞋ pape wambel hiagoma etap anaeꞋ pape pandaꞋ maol naninani. AeꞋ andaꞋmepago danifel nafeꞋmago ipeꞋ.

James 1

1 AeꞋ Jems, ape owina God naloma Dembinai Jisas Krais andaꞋ maola amam atom. AndaꞋ basef amama mafeꞋmago ipeꞋ epes hipei Judaipei epes wambotogw loumi 12-peleim. IpeꞋ pakwaha wambel ofagama ipeꞋima ma pafeꞋ pape wambel hiagoma etap anaeꞋ pape pandaꞋ maol naninani. AeꞋ andaꞋmepago danifel nafeꞋmago ipeꞋ.

Amamaga meagwambipei mandaꞋepa pataga laꞋifipa

2 IpeꞋ sahin owan aeꞋipei, maim nimeguf amamaga meagwambipei motagamepa, ukup ipeꞋimi miꞋi andeandeꞋ pendanifel etin pepan. 3 DeiꞋ main, ipeꞋ pegawa amama mogwamba baleꞋef ipeꞋinai, amama mandaꞋepa pitu laꞋifipa ma nimanimi meatagamipei. 4 EaꞋ ipeꞋ pitu laꞋifipa ma waf anama neataga boꞋona ma ipeꞋ ma anona nemaf petaga andeandeꞋ endilisi, waf aonai aꞋepa. Ama waf hianai Godi mope ipeꞋ, eaꞋ ipeꞋ ina anona waf buꞋunai aꞋepa, owaꞋ.

Emi egafis gawa buꞋunai aꞋasi, esis sihaliꞋ God

5 Emi egafis gawa buꞋunai aꞋasi, esis sondaꞋ beten sihaliꞋ Goda noseꞋasana. DeiꞋ main, Anan naseꞋasa amamaga hiami naꞋa ma epes hiesi, ina ninifalis, owaꞋ. 6 Epes isima esis sombaleꞋefana endilisi ma sondaꞋ beten sohaliꞋa God. Ina sope ukup biambiefim, owaꞋ. Esis sombaleꞋefana laꞋifis. Emi egafis sape ukup biambiefimi, esis ina sembaleꞋefana laꞋifis, owaꞋ. Ukup asasimi siꞋi embel uf nalo naoh mohafel. 7 Epes isima ina ukup miꞋi Dembinai noseꞋas anom amamaga, owaꞋ. Ukup asasimi mandawal biefim mapoma waf hianai esis sandaꞋanai eaꞋ ina sape ukup etifim, owaꞋ.

Basef epes kwahusi saloma epes amamaga hiamisi

9 Sahin owan Kristen emi egafis kwahusi esis sondanifel ma God nafelas nigiambamas deiꞋ anona nemaf wapotiꞋ. 10 ApeꞋ Kristen emi egafis amamaga hiamisi, esis sondanifel ma God nandaꞋas safeꞋ owina sembaleꞋefa Krais. DeiꞋ main, epes amamaga hiamisi anona nemaf sogaꞋ siꞋi afis mataga otalef mape nogota bandana ma mandalaꞋof mowa. 11 IpeꞋ pegawa aon alipunai natefi ma owaf naha otalef amama ma alaꞋum hiꞋalam. Afis mataga miaꞋof eaꞋ sosaf afisi nambimb mowaꞋ. Epes isima amamaga hiamisi sondaꞋam naꞋama etin. Nemaf anama sondaꞋ maola bisnisi atom, sogaꞋ siꞋi sosaf afisi mowa.

Basefa hiahaom meagwambipei matagama epes

12 Emi egafis saitu laꞋifisa hiahaom meagwambasi matagamas, esis sondanifel. DeiꞋ main, nemaf anama esis sikilaꞋ amama waf aonai naninani eaꞋ hiꞋilana, anona nemaf esis sofaꞋ amamaga buꞋwami siꞋi prais. Amama naꞋama. Ambal namunai God naꞋi endilisi nosoꞋasam emi egafis ukup maimaila anan. 13 Emi egalin amamaga meagwambipei motagamen ma nondaꞋ waf aonai, enin ina niꞋi God nandaꞋ enin deiꞋ nandaꞋ waf anama. God ina nandaꞋ enin epen nandaꞋ waf aonai, owaꞋ. EaꞋ ina enis epes laꞋifisa sondaꞋana nondaꞋ waf aonai, owaꞋ. 14 EaꞋ ukup awami apeꞋimi atom mafelapa makikipapa ma mafeꞋ matoloꞋw isalef siꞋi anona mafin aolupunai nafeꞋ natoloꞋw esag. 15 EaꞋ ukup apeꞋimi mohafel mandaꞋapa mandaꞋ waf aonai. Anona nemaf waf anama aonai notaga luꞋuna, nondaꞋapa mogaꞋ.

16 IpeꞋ sahin owan, aeꞋ okom nainailipa. NaꞋama ipeꞋ pembasoꞋma ipeꞋ etipa. 17 Amamaga buꞋwami hiami siꞋi presen, amama ahalomapa apeꞋinai naseꞋapam misilaꞋi heven. Anan nandaꞋ mafifili aon alipunai owambunai maloma ondowa motawa ilif otaga. Owaf naluwi, ambagof laom bandam. EaꞋ God ina nandahoꞋof naꞋama siꞋi ambogof, owaꞋ. Anan nape naꞋama etin laꞋelaꞋef hihif. 18 Anan naila okom ananinai atona ma basef ananimi endilisimi ma apeꞋ mataga mape maliꞋma amamaga amama Anan nandaꞋami.

ApeꞋ momeꞋ basef milam

19 IpeꞋ sahin owan aeꞋipei, ipeꞋ ukup mopoma basef amama naꞋama. IpeꞋ hipei pendandombam ulala pemeꞋ basef. EaꞋ ina piꞋi anom basef pegwam ulal, owaꞋ. EaꞋ ina ukup wandafum mehip, owaꞋ. 20 DeiꞋ main, waf anama epes ukup wandafumanai nilai waf aonai. Ina nawalapai waf buꞋunai Godi, owaꞋ. 21 Amama atom deiꞋ ipeꞋ kwahago waf aonai neloma waf aonai hianai hiꞋilana. Waf anama aonai epes hiesi sandaꞋana laꞋelaꞋef. EaꞋ pinindifa ipeꞋ pepe owina Goda pefaꞋ basef amama ananimi mope opalef ipeꞋimi. Basef amama laꞋifimi ma mofaꞋai ipeꞋ pitanima pifiꞋmai God.

22 IꞋi pemeꞋ basef Godi ina pailam, ipeꞋ pambasoꞋma ipeꞋ etipa. Amama hapaimi. IpeꞋ pemeꞋam pilam, andeandeꞋ. 23 Emi egafis semeꞋ basef Godi owaꞋ sieliam, esis siꞋi enis epes safela glas sati amagah asasimi. 24 Esis satolom eaꞋ, sandamboma safeꞋ, ina okokoma amagah asasimi, owaꞋ. 25 EaꞋ basef miꞋuli Godi matagahepa makwaha waf aonai, amama andeandeꞋ. Emi egalin niti miꞋuli anama ofagema andeandeꞋ laꞋelaꞋef nilam, epen inima God nofaloꞋman nondaꞋan nendanifela maina maol anan nandaꞋanai.

26 Emi egafin niꞋi, “AeꞋ andaꞋ lotu endilisi aila God” ma enin iꞋi owaꞋ nimafi malogel ananinai andeandeꞋ, epen inima nambasoꞋma okom ananinai atona. EaꞋ deiꞋ baleꞋef ananinai ma lotu main falafunai atona. 27 Waf sandaꞋ lotuwanai boꞋona andeandeꞋ ofagena aꞋana naep Ahalomapa apeꞋinai Godi, anama naꞋama. IꞋi enis awasi mamasas aꞋasi esis etis sope, o nemataꞋw alifiꞋwi akwaꞋw atoꞋw kwape kwahuꞋwi, apeꞋ migiambamasa otamba gwaꞋaimi maim. EaꞋ mumafi pe apeꞋinai andeandeꞋ ma waf aonai etapanai ina nendaꞋ opalef apeꞋimi motaga aom, owaꞋ.